Inicio Actualidad A mudanza en feminino do rueiro da cidade chega a Tik Tok...

A mudanza en feminino do rueiro da cidade chega a Tik Tok grazas ao programa ‘A memoria das mulleres’

A tiktoker María Rúa (@pradorua) publica hoxe ás 15 horas un vídeo onde recolle algúns dos últimos cambios feitos nas rúas da cidade na procura dunha maior igualdade a través dunha maior presenza da muller

É a sexta das oito pezas audiovisuais que se están a distribuír a través de tres recoñecidas influencers galegas

«A maioría de rúas teñen nome de homes. En Pontevedra isto está mudando». Son os dous primeiros enunciados que a tiktoker María Rúa (pradorua) sinala no seu último vídeo, amparado baixo o paraugas do programa ‘A memoria das mulleres’, iniciado polo Concello de Pontevedra.

A influencer galega utiliza a música das Tanxugueiras para apoiar a mensaxe que quere transmitir, e lembrar que no rueiro da cidade, xunto con outros espazos públicos, as mulleres están cada vez máis visíbeis. Rúa ilustra isto con imaxes dos últimos murais feitos na cidade, e sinalando algunhas das mulleres ilustres que xa contan con representación na cidade como Amalia Álvarez,  Josefina Arruti, María Victoria Moreno, Concepción Arenal; animando a seguir loitando por unha representación máis xusta e igualitaria.

A peza audiovisual queda enmarcada na filosofía base de ‘Memoria das mulleres’ que é a da difusión da loita antifascista e da traxectoria das mulleres pontevedresas entre o público máis novo, utilizando as plataformas e recursos propios da mocidade pontevedresa actual. O proxecto da Concellaría de Memoria Histórica xa difundiu un total de seis vídeos deste tipo, onde as tiktokers galegas Laura Franco, Leti da Taberna e María Rúa poñen voz e imaxe a situacións de índole histórica ou social como Ence o drama da draga ou a defensa da lingua e a loita contra os tópicos máis comúns.

A de hoxe é a sexta peza, polo que aínda quedarán dúas máis por seren estreadas nas vindeiras semanas, até alcanzar os oito vídeos publicados.

Artículo anteriorNoticia Presentación de los Rías Baixas Fest 2021 Deputación PortAmérica Sinsal Revenidas Vive Nigrán, SonRías Atlantic O Marisquiño
Artículo siguienteA aposta polas novas tecnoloxías, unha constante nos obradoiros de Ponteverán
Equipo de la redacción central de EditorialOn. Somos muchos, de sitios muy distintos.